Pentagoni po zhvillon opsione ushtarake për një “goditje përfundimtare” ndaj Iranit, që mund të përfshijë përdorimin e forcave tokësore dhe një fushatë të madhe bombardimesh, sipas dy zyrtarëve amerikanë dhe burimeve të njohura me çështjen, të cilët kanë folur për Axios.
Ky plan synon të intensifikojë presionin mbi Teheranin, veçanërisht nëse Ngushtica e Hormuzit mbetet e mbyllur, duke rritur rrezikun e një përshkallëzimi të gjerë ushtarak.
Burimet amerikane identifikojnë katër opsione kryesore të mundshme për goditjen përfundimtare: pushtimi ose bllokimi i Ishullit Kharg, qendra kryesore e eksporteve të naftës iraniane; pushtimi i Ishullit Larak, i cili konsolidon kontrollin e Iranit mbi Ngushticën e Hormuzit dhe strehon bunkerë dhe anije sulmuese; pushtimi i Ishullit Abu Musa dhe dy ishujve të vegjël përreth, të kontrolluar nga Irani, por të pretenduar nga Emiratet e Bashkuara Arabe; dhe bllokimi ose konfiskimi i anijeve që eksportojnë naftë iraniane nga ana lindore e Ngushticës.
Përveç këtyre, Pentagonit i janë paraqitur skenarë për operacione tokësore në brendësi të Iranit për të siguruar uraniumin e pasuruar nga objektet bërthamore. Alternativa është të ndërmerren sulme ajrore masive ndaj këtyre faciliteteve, për të parandaluar përdorimin e materialit bërthamor nga Irani.
Megjithatë, zyrtarët e Shtëpisë së Bardhë e përshkruajnë çdo operacion tokësor si “hipotetik”, ndërsa Presidenti Donald Trump thuhet se është i gatshëm të intensifikojë veprimet, nëse negociatat nuk japin rezultate konkrete.
Sekretarja e Shtypit e Shtëpisë së Bardhë, Karoline Leavitt, paralajmëroi Iranin se Trump është i gatshëm të godasë “më fort se kurrë më parë” nëse nuk arrihet një marrëveshje.
“Presidenti nuk flet për të kërcënuar, ai është gati të shpalosë ferrin. Irani nuk duhet të gabojë sërish… çdo dhunë më tej do të ndodhë për shkak se regjimi iranian refuzon të arrijë një marrëveshje”, tha Leavitt.
Forcat amerikane po dërgohen në rajon për të përforcuar praninë: një njësi e Marinës do të arrijë këtë javë, një tjetër është duke u vendosur, si dhe komanda e Divizionit 82 Ajror është urdhëruar të dislokohet së bashku me një brigadë këmbësorie prej disa mijëra trupash.
Irani nga ana tjetër ka shprehur mosbesim ndaj këtyre lëvizjeve dhe i sheh ato si një maskim për sulme të fshehta. Kryetari i Parlamentit iranian, Mohammad Bagher Ghalibaf, paralajmëroi se Inteligjenca iraniane sugjeron se “armiqtë e Iranit, me mbështetjen e një vendi rajonal, po përgatisin një operacion për të pushtuar një nga ishujt iranianë”, duke iu referuar Emirateve të Bashkuara Arabe dhe pretendimit të tyre mbi Abu Musa.
Ai shtoi se çdo lëvizje armiqësore do të goditej pa kufizime nga forcat iraniane.
Ndërkohë, disa vende të tjera, përfshirë Pakistanin, Egjiptin dhe Turqinë, po përpiqen të organizojnë një takim mes SHBA-ve dhe Iranit për të arritur një negociatë.
Megjithatë, skepticizmi i komandantëve të Forcave të Gardës Revolucionare Islamike (IRGC) mbetet i lartë, duke e bërë çdo marrëveshje potenciale të pasigurt.
