Kur Luca Zidane vendosi të përfaqësonte Algjerinë, vendin e origjinës së babait të tij, zor se e kishte imagjinuar se gjithçka do të shkonte kaq shpejt e kaq mirë. Brenda pak muajsh, ai kaloi nga një grumbullim i parë për ndeshjet kualifikuese të Botërorit, në titullar dhe në një nga figurat kryesore të Algjerisë në Kupën e Kombeve të Afrikës.
Ky turne po e vërteton plotësisht vlerën e tij në portë. Në katër ndeshje të zhvilluara deri tani, Luca nuk ka pësuar asnjë gol, edhe pse e fundit — ndeshja e 1/8-ave ndaj RD Kongos — u zgjat deri në kohën shtesë.
Me pak fjalë, portieri Zidane ka grumbulluar 390 minuta në turne pa e nxjerrë topin nga rrjeta. Ai është portieri i parë algjerian që mban portën të paprekur në dy ndeshjet e para që nga Mohamed Haniched në vitin 1996 — por në rastin e tij, e ka bërë këtë në katër ndeshje.
Nga Franca te Algjeria
Luca, i cili ka përfaqësuar Francën nga U-16 deri te U-20, zgjodhi Algjerinë edhe për mundësinë që të luante në Kupën e Kombeve të Afrikës. Shpejt ai u imponua si zgjedhja e parë në portë, duke lënë pas Anthony Mandrea (Caen), i cili fillimisht pritej të ishte titullari, si edhe Ousamma Benbot (Algjer).
Vendimi për t’i besuar vendin e titullarit Luca Zidane po rezulton një sukses i plotë: Algjeria është në çerekfinale (ku do të përballet me Nigerinë) dhe ai vazhdon të jetë i pathyeshëm në portë. E veçanta tjetër është se nga tribuna e mbështet edhe babai i tij, Zinedine Zidane, duke e bërë edhe më të veçantë paraqitjen e tij në këtë turne në Marok.
