Analisti Fatos Lubonja, duke folur për protestën e 10 shkurtit, u shpreh se ajo duhej të kishte pasur një tjetër dinamikë, në raport me kauzat për të cilat u organizua.
I ftuar në News24, Lubonja deklaroi se, sipas tij, përballë akuzave për vjedhje që ai ia atribuon zv/kryeministres Belinda Balluku, reagimi qytetar duhej të kishte qenë shumë më i fortë.
“Me vjedhjet që ka bërë Balluku, Kuvendi duhet të ishte djegur. Ne jemi popull i nënshtruar, ndryshe do të reagonte një popull në vendet perëndimore,” tha Lubonja.
Lubonja: “Problem është raporti i pushtetit me protestat, që nuk pranohen. Duhen protesta shumë më të forta. Me këto vjedhje që ka bërë Balluku me Ramën mund të ishte djegur Kuvendi. Ne bëjmë sikur protestojmë, jemi popull i nënshtruar.
Do e kishin djegur po të ishte popull nga këta perëndimorët. Atë Bettino Craxin, kur i doli skandali, e kanë pritur të dalë nga hoteli dhe kanë dashur ta linçojnë. Ndaj këtu duhet ridimensionuar çdo gjë. Çfarë t’u bësh këtyre, këta janë banditë. Protestat thonë bëjini paqësore. Përdorimi i molotovëve është normale, nuk u vra njeri.
E keni parë çfarë bëjnë grekët, francezët? Ne popull dele jemi, duan të na bëjnë kafshë më të butë.
Meqë më përmendët 21 janarin, e kam thënë dhe herë tjetër, 700 mijë euro ishte biseda e Metës me Priftin, deklaratat e PS atëherë ishin që populli nuk duron dot më. Dhe këta nuk e morën përgjegjësinë si organizatorë.”
