Më 13 dhjetor, Lionel Messi do të vizitojë qytetin Kolkata në Indi, ku do të marrë pjesë në ceremoninë e zbulimit të një monumenti gjigant 21 metra të lartë, të ndërtuar në nder të tij.
Sipas BBC, skulptura e madhe paraqet Messin duke mbajtur trofeun e Kupës së Botës 2022 — momenti më i madh i karrierës së tij. Vepra madhështore, e cila u punua për 45 ditë, do të jetë qendra kryesore e “fan zone”-s së qytetit.
Zona për tifozët do të përfshijë gjithashtu:
- një skulpturë në përmasa reale të Messit të ulur mbi një fron, i rrethuar nga kopjet e trofeve të tij,
- një replikë të shtëpisë së tij në Miami.
Në ceremoninë e inaugurimit do të jenë të pranishëm edhe bashkëlojtarët e tij te Inter Miami, Luis Suárez dhe Rodrigo De Paul.
Pas ndalesës në Kolkata, Messi do të vazhdojë turin e tij në Indi duke vizituar Hyderabad, Mumbai dhe New Delhi — një tur i organizuar për të nderuar arritjet e tij dhe për të promovuar futbollin në vend.
