Një nga lojtarët e parë që i dha lamtumirën Xabi Alonso-s pas zyrtarizimit të largimit të tij nga Real Madridi ishte Kylian Mbappé. Sulmuesi francez ishte në stol në finalen e Superkupës dhe, sipas gazetës L’Équipe, ai u sforcua maksimalisht, madje pranoi të luante pa qetësues, me shpresën se do ta përmbyste ndeshjen ndaj Barcelonës dhe do ta shtynte shkarkimin e trajnerit.
Sipas së përditshmes franceze, kapiteni i Francës e kishte kuptuar se një humbje mund t’i kushtonte postin Xabi Alonso-s. Mbappé vuante nga një dëmtim në gjurin e majtë dhe parashikohej të mungonte deri më 21 janar. Pasi humbi gjysmëfinalen e Superkupës ndaj Atleticos, ai udhëtoi në Arabinë Saudite të premten për të provuar të ishte gati për finalen. Ai hyri në lojë nga stoli pikërisht në momentin kur Raphinha shënoi golin vendimtar 3-2 për Barcelonën.
Edhe pse ekzistonte rreziku i rikthimit të dëmtimit, Mbappé insistoi të luante dhe, sipas L’Équipe, refuzoi çdo lloj injeksioni. Gjatë minutave në fushë ai ishte aktiv në sulm, pavarësisht kufizimeve, dhe madje fitoi edhe një karton të kuq për De Jong pas një ndërhyrjeje të ashpër ndaj tij.
Pas shkarkimit të Xabi Alonso-s, Mbappé publikoi një mesazh lamtumire në rrjetet sociale: ai tha se ishte kënaqësi të luante dhe të mësonte prej tij, e falënderoi për besimin që i dha që nga dita e parë dhe e përshkroi si trajner me ide të qarta dhe shumë njohuri për futbollin, duke i uruar sukses në kapitullin e ardhshëm.
L’Équipe shton se mes Mbappé dhe Xabi Alonso-s ishte krijuar një marrëdhënie e afërt, ku flisnin jo vetëm për futboll, por edhe për gjëra të tjera. Xabi ishte një nga mbështetësit më të mëdhenj të Mbappé, i cili në gjashtë muajt me të në stol realizoi 29 gola dhe 5 asistime. Megjithatë, edhe përpjekja e madhe e francezit në finalen e Superkupës nuk mjaftoi për të ndryshuar fatin e trajnerit.
