Sot, një nga emrat më të shquar të muzikës shqiptare, Ilir Shaqiri, feston ditëlindjen. Me një karrierë që ka mbushur dekada dhe ka lënë gjurmë të thella në shpirtin e çdo shqiptari, Ilir Shaqiri ka kontribuar me këngët e tij, të cilat janë bërë pjesë e historisë muzikore.
Në këtë përvjetor të 65-të, një urim i veçantë i ka ardhur nga djali i tij, Korabi, i cili ka shprehur dashurinë dhe mirënjohjen përmes fjalëve më të ëmbla.
“Gëzuar ditëlindjen e 65-të, babë i dashur, Ilir Shaqiri. Edhe pse sot jam larg, zemra ime rri gjithmonë pranë teje, pranë zërit tënd që më rriti, këngëve të tua që u bënë histori, e shpirtit tënd që nuk njeh lodhje.
Ti je nga ata burra që nuk plaken kurrë, sepse jetojnë në ndriçimin e artit, në thirrjen e misionit, në amanetin e këngës. Dhe vërtet, nuk ka pensionim për artistin, jo për një artist si ti, që ka vënë dritë e krenari në çdo shtëpi shqiptare”, shkruan Korab Shaqiri.
Ai e falenderon të atin për çdo fjalë e këshillë, për shembullin me të cilin e ka rritur, forcën, dashurinë, rrugën që e ecin bashkë, edhe kur kilometrat i ndajnë fizikisht.
“Sot, në këtë ditë të madhe të jetës tënde, të uroj shëndet, qetësi, gëzim e dritë në çdo hap! Uroj që kënga jote të vazhdojë të frymojë gjatë, dhe do të frymoj siç ka frymuar gjithmonë, e zemra jote të mbetet po aq e madhe sa gjithnjë. Gëzuar 65-vjetorin, babë! Me gjithë shpirtin tim, të uroj nga larg, babë”, përmbyllet urimi.
Ilir Shaqiri është këngëtar, autor këngësh, shkrimtar, si dhe veteran pjesëmarrës i UÇK-së. Ai është autor i teksteve të rreth 619 këngëve të lehta, popullore dhe folklorike, ndërsa ka marrë pjesë në më shumë se 1000 koncerte dhe përmbi 900 prej tyre janë humanitare.
