Shtëpia e Michel Platini-t në Bouches-du-Rhône, në jug të Francës, është bërë objekt i një grabitjeje.
Sipas RTL, legjenda e futbollit francez e ka vënë re një burrë të veshur me kapuç dhe rroba të zeza, i cili qëndronte jashtë dritares së tij rreth orës 5:30 të mëngjesit. Pak minuta më vonë, Platini ka kuptuar se mungonin rreth 20 trofe dhe medalje nga koleksioni i tij.
Zyra e prokurorit të Marsejës ka njoftuar se është hapur një hetim për “vjedhje të rëndë” në rezidencën e ish-lojtarit të njohur. Autori i krimit ende nuk është identifikuar dhe është larguar nga vendi i ngjarjes. Fatmirësisht, Platini nuk ka pësuar dëmtime fizike dhe nuk ka qenë i përfshirë drejtpërdrejt në incident, edhe pse ngjarja ka lënë një ndikim të thellë te ai.
Ndër sendet e vjedhura ka çmime me vlerë të madhe, përfshirë ato që lidhen me karrierën e tij të shkëlqyer: Platini është fitues i tre Topave të Artë (1983, 1984, 1985), dhe është një figurë ikonike në futbollin evropian dhe botëror.
Autoritetet franceze janë duke kryer hetime dhe po analizojnë materialet filmike të kamerave të sigurisë për të gjetur autorin dhe për të rikuperuar sendet e humbura. Ky është një tjetër rast i këtij lloji që ka prekur personalitete të shquara të futbollit në Francë në vitet e fundit.
