Presidenti i Barcelonës, Joan Laporta, foli në Catalunya Radio për disa tema të nxehta që prekin klubin katalanas — nga vizita e papritur e Lionel Messit në Spotify Camp Nou te tensionet me Real Madridin, rindërtimi i stadiumit dhe e ardhmja e trajnerit Hansi Flick.
Laporta konfirmoi se nuk e kishte ditur për vizitën e Messit në kantierin e Camp Nou, por e përshkroi si një gjest emocional:
“Nuk e dija. Ishte një veprim spontan krenarie barceloniste. Ky është shtëpia e tij. Kur më treguan çfarë kishte ndodhur, më dukej një gjest simpatik dhe i sinqertë. Messi e di që e duam dhe se këtu do të marrë nderimin më të bukur në botë.”
Sa i përket marrëdhënieve me Real Madridin, Laporta u shpreh hapur:
“Marrëdhëniet nuk janë të mira për shkak të përfshirjes së tyre në çështjen Negreira. Ata paraqitën prova të parëndësishme dhe të papërfunduara. Është një situatë e tensionuar, megjithëse i trajtojmë gjërat me respekt. Jemi rivalë të përjetshëm, por kjo nuk do të thotë që duhet të prishim ekuilibrin.”
Presidenti u ndal gjithashtu te Lamine Yamal, duke lavdëruar pjekurinë dhe profesionalizmin e 18-vjeçarit:
“Është shumë i pjekur për moshën që ka. Ka një problem me pubalgjinë, por ka treguar shumë përkushtim për klubin. Është një gjeni, më i miri në botë në rolin e tij.”
Laporta shtoi se është i kënaqur me Hansi Flick-un dhe konfirmoi se do të gjendet një marrëveshje për vazhdimësinë e tij në stolin e Barcelonës.
Sa i përket rikthimit në Spotify Camp Nou, Laporta theksoi se faza e tretë e stadiumit pritet të jetë gati për fillimin e sezonit të ardhshëm, ndërsa vlerësoi punën e kompanisë Limak për ritmin e lartë dhe respektimin e standardeve ligjore.
Për zgjedhjet e ardhshme presidenciale, ai tha:
“Do të zhvillohen midis 15 marsit dhe 15 qershorit, kur të jetë më mirë për Barçën. Nuk mendoj për oportunizëm politik. Dua ta përjetoj këtë periudhë intensivisht.”
Në fund, Laporta riktheu edhe një herë mesazhin e tij për modelin e pronësisë së klubit:
“Sa të jem unë president, Barcelona do të mbetet në duart e anëtarëve të saj. Nuk jemi një biznes për fitim. Jemi një klub katalanas, i hapur ndaj botës, që beson te liria, demokracia dhe kultura jonë.”
