Tashmë është zyrtare, Barcelona ka rinovuar me Lamine Yamal deri në vitin 2031. Yamal do të përfitojë një pagë vjetore rreth 15 milionë euro, plus bonsue të tjera. Gjithashtu, atij i është besuar fanella me numrin 10 për sezonin e ri.
Por, Lamine Yamal e ka “refuzuar” ta mbajë fanellën me numrin 10 për aq sa kohë sa Ansu Fati është ende pjesë e Barcelonës dhe është pikërisht 22-vjeçari që e mban këtë numër.
“Derisa Ansu Fati të vendosë për situatën e tij, nuk dua të flas për numrin 10, i takon atij. Ai është miku im”, mësohet t’u ketë thënë Yamal drejtuesve të Barcelonës, sipas asaj që raporton “El Pais”.
Gjithsesi, largimi i Ansu Fati nga Barcelona është thuajse 100% i sigurt këtë verë, ku ekipi më i interesuar është Monaco në Ligue 1. Kështu që, sipas të gjitha gjasave numri 10 te Barcelona sezonin e ri do mbahet Lamine Yamal. Por, gjesti që ka bërë ndaj shokut të ekipit Ansu Fati, meriton përgëzime dhe respekte.
