Një lajm i keq për Napolin vetëm një ditë para ndeshjes ndaj Monzës. Gjatë stërvitjes së ditës së premte, David Neres pësoi një tërheqje muskulore, duke e përjashtuar automatikisht nga udhëtimi drejt Monzës. Gjendja e sulmuesit brazilian do të vlerësohet në ditët në vijim, por për momentin ai është jashtë dispozicionit të trajnerit Antonio Conte.
Conte: “Ne nuk kemi alibi, dalim në fushë për të fituar”
Në konferencën për shtyp, Antonio Conte komentoi jo vetëm mungesën e Neres, por edhe formën e skuadrës, ecurinë në kampionat dhe situatën e disa lojtarëve.
“Para së gjithash, duhet të sigurojmë një vend në Champions League. Ky është objektivi. Po bëjmë diçka që shkon përtej pritshmërive, duke marrë parasysh çfarë ndodhi sezonin e kaluar. Deri në fund do të jemi sa më të bezdisshëm që të jetë e mundur për rivalët tanë.”
Kvaratskhelia dhe objektivat e vërtetë
Conte komentoi edhe deklaratat e tij të mëparshme për Khvicha Kvaratskhelia dhe filozofinë e klubit:
“Kam qenë i qartë, Napoli nuk duhet të jetë një klub tranzicioni. Por disa gjëra që thashë në fillim të vitit nuk mund t’i konfirmoj më. Këto tetë muaj më kanë bërë të kuptoj se jo gjithçka është e realizueshme këtu. Nuk dua të shihem si gënjeshtar për gjëra që nuk u përmbushën.”
Për tifozët: “E kemi për detyrë t’i ushqejmë ëndrrat e tyre”
“Do të ketë rreth 10 mijë tifozë tanë në Monza. Kjo është e jashtëzakonshme. Ne jemi të parët që duam të ushqejmë këtë pasion që ata na e kanë transmetuar. Nuk ka qenë e lehtë dhe nuk do të jetë, por nuk kemi justifikime. Duhet të vazhdojmë me forcat që kemi.”
Për Interin dhe situatën e Buongiorno-s
Conte nuk kurseu as fjalët pozitive për rivalët:
“Urime për Interin, janë në gjysmëfinale duke mposhtur një skuadër të fortë. E dimë se janë të fortë, nuk kishte nevojë për këtë ndeshje për ta kuptuar. Kjo e bën edhe më të vlefshëm kampionatin tonë.”
“Buongiorno? Po monitorojmë situatën. Është një mungesë kritike për fazën mbrojtëse, por nuk ka alibi. Nesër dalim në fushë për të fituar. Pikë.”
