Familja e Lionel Messit po kalon një moment jashtëzakonisht të vështirë pas një aksidenti horror që përfshiu motrën e vogël të yllit argjentinas, Maria Messi. Sipas raportimeve të fundit nga “Mirror Football”, ngjarja ka ndodhur në rrugët e Miamit, ku Maria ka humbur kontrollin e mjetit të saj dhe është përplasur me forcë me një mur betoni. Përplasja ka qenë aq e fuqishme sa ka shkaktuar dëme të rënda dhe lëndime të shumta trupore për motrën e lojtarit të Inter Miamit.
Gjendja e saj shëndetësore paraqitet komplekse; raportohet se ajo ka pësuar dy fraktura në rruaza, ka thyer krahun dhe thembrën, si dhe ka pësuar djegie të shkallës së lartë, të cilat mjekët po i trajtojnë me mjaft vështirësi. Megjithëse lëndimet janë serioze dhe do të kërkojnë një kohë të gjatë rikuperimi, mjekët kanë dhënë një lajm shpresëdhënës duke konfirmuar se jeta e Maria Messit aktualisht nuk është në rrezik.
Ky aksident tragjik ka ndodhur në një moment shumë të rëndësishëm për jetën e saj private. Maria ishte planifikuar të martohej muajin e ardhshëm me një nga trajnerët e akademisë së të rinjve të Inter Miami. Tashmë, në vend të ceremonisë martesore, ajo do të përballet me një proces të vështirë dhe sfidues rehabilitimi. E gjithë familja Messi është alarmuar dhe po i qëndron pranë në këto momente delikate për t’i siguruar kujdesin më të mirë të mundshëm.
