Derbi i Champions League mes Real Madridit dhe Atletico Madridit, i fituar nga “Los Blancos”, ishte në qendër të polemikave për shkak të një episodi kontrovers. Goli nga penalltia i Julian Álvarez u anulua nga gjyqtari Szymon Marciniak me rekomandimin e VAR-it, pasi sulmuesi argjentinas e preku topin dy herë, duke shkelur Rregullin 14. Ky rregull përcakton se goditësi nuk mund ta prekë sërish topin derisa ai të jetë prekur nga një lojtar tjetër, përveç rasteve kur topi përplaset në shtyllë ose traversë.
Pamjet televizive nuk i kanë qetësuar tifozët e Atlético Madridit, kritikat janë intensifikuar, përfshirë komentin e ish-gjyqtarit spanjoll Mateu Lahoz. Ky i fundit shprehu habinë e tij për zgjedhjen e Marciniak, që të mos e rishikonte aksionin në monitor, duke theksuar rëndësinë e transparencës në procesin vendimmarrës. Lahoz tha se një vendim kaq vendimtar kërkon një vështrim të drejtpërdrejtë nga gjyqtari, në vend që të mbështetet verbërisht tek VAR-i.
“Na duhet më shumë transparencë, që të shohim përmes syve të gjyqtarit dhe të mos e shtrembërojmë lojën”, – deklaroi Lahoz. Ai shtoi gjithashtu se, po të ishte në vend të Marciniak, do të kishte dashur ta analizonte vetë situatën për të marrë një vendim të informuar. Teknologjia, edhe pse e dobishme, nuk duhet të zëvendësojë përgjegjësinë e gjyqtarit, përndryshe lihen hapësira për dyshime dhe polemika. Ky episod ka ngritur kështu pikëpyetje mbi mënyrën se si menaxhohen vendimet arbitrale në futbollin modern.
