Eksperti i ekonomisë, Pano Soko, duke komentuar në emisionin “Të Paekspozuarit” në MCN TV skandalin e kompanisë Bankers u shpreh se historia e saj është si e shumë të tjerave që kanë rrëmbyer pasuritë e shqiptarëve.
Ai renditi krahas Bankers edhe Kurumin, ato që shfrytëzojnë bakrin, apo hidrocentralet dhe ky nuk është vetëm korrupsion banal, por plan i mirëmenduar për të marrë çdo gjë që duhej të prodhonte mirëqenie për qytetarët.
“E gjitha ka qenë një plan. Në fillim kanë qenë disa njerëz të uritur që kanë fituar disa lekë, por nuk është kjo.
Kjo që ka ndodhur me pasuritë e shqiptarëve është një plan për tua vjedhur pasuritë shqiptarëve. E njëjta histori si Bankers është rafineria, është kromi, është bakri, hidrocentralet me ujin e shqiptarëve.
Kjo nuk është një ngjarje e zakonshme korrupsioni banal, por një plan i mirëmenduar që nga çdo gjë që ne mendojmë të prodhojmë të ardhura për qytetarët, si Norvegjia dhe vendet e tjera që me atë naftë që kanë kanë prodhuar mirëqenie. Këta edhe naftën tonë na e hoqën.
Ne e pasuronim naftën në vendin, benzinën, dieselin në vend. Këta e hoqën. Nuk është vetëm për të fituar para. Kromin ne e pasuronim në vend, këta e hoqën. Kromin e çojmë në Kinë, naftën e çojmë në Evropë dhe e marrim naftën nga refineritë e botës. Këtë bëjmë me bakrin, me ujin.
Nëse historia 35-vjeçare do të ishte një gjellë, Bankersi do të ishte luga. Kjo është gjella e qenve që kemi prodhuar”- tha Soko.
