Arsenal po përgatitet të jetë shumë aktiv gjatë merkatos së ardhshme të verës, “Topçinjtë” synojnë të bëjnë dy goditje “big” në mesfushë dhe sulm, duke menduar që me këto dy super përforcime do jenë të aftë të garojnë dhe të fitojnë titullin në Premier League sezonin e ardhshëm.
Dy objektivat kryesore të Arsenal për merkaton e verës janë: Martin Zubimendi dhe Alexander Isak. Zubimendi është prioritet në mesfushë për Artetën, i cili kërkon një mesfushor me vizion dhe spanjolli duket se është profili i duhur.
Klauzola e lirimit të lojtarit është 60 milionë euro, një shifër që Arsenali është i gatshëm ta paguajë pa e menduar dy herë. Ardhja e Zubimendit do të forconte boshtin e mesfushës së bashku me Declan Rice dhe Martin Odegaard.
Alexander Isak është emri i zgjedhur nga Arteta për të forcuar sulmin dhe për ta bërë atë pike referuese të skuadrës në këtë repart. Suedezi po shkëlqen me Newcastle këtë sezon dhe interesi për të është shumë i madh. “Qymyrxhinjtë” e vlerësojnë 150 milionë euro, por Arsenal shpreson se mund të mbyllë marrëveshjen për 120 milionë euro, sipas “The Sun”.
