Kryeministri i Kosovës, Albin Kurti, ka pritur në takim kongresistët amerikanë Mike Turner dhe Donald Norcross, ku fokusimi kryesor ishte forcimi i marrëdhënieve midis Kosovës dhe Shteteve të Bashkuara, veçanërisht në fushën e mbrojtjes. Në njoftimin e lëshuar nga kryeministria, Kurti njoftoi për angazhimet e Kosovës në trajnimin ushtarak, duke theksuar se më shumë se 1000 pjesëtarë të Forcës së Sigurisë së Kosovës (FSK) kanë marrë pjesë në programe të ShBA-së në katër vitet e fundit. Këto trajnime përfshijnë edukimin në institucione të njohura si West Point dhe U.S. Army War College.
Gjithashtu, Kurti e përmendi angazhimin e Kosovës në stërvitjet ushtarake “Defender Europe”, duke pohuar se edicioni i fundit kishte parë Komandën e Divizionit të 28-të të Ushtrisë Amerikane të vendosur në aeroportin ushtarak në Gjakovë, e cila drejtoi operacione në Evropën Juglindore. Kryeministri theksoi prokurimin e paisjeve ushtarake amerikane, përfshirë sistemet anti-tank Javelin, si dhe nënshkrimin e marrëveshjes për Mbrojtjen e Informacionit të Klasifikuar dhe CISMOA, duke e pozicionuar Kosovën si vend të besueshëm.
Në lidhje me orientimin e Kosovës, Kryeministri shprehu përkushtimin ndaj integrimit euro-atlantik dhe synimin për anëtarësim në NATO dhe BE. Ai nënvizoi se Kosova dëshiron të kontribuojë në paqen dhe sigurinë evropiane, duke u shfaqur si ambasadore e stabilitetit në rajon.
Takimi gjithashtu përfshiu biseda për bashkëpunimin ekonomik, përfshirë energjinë, teknologjinë dhe projekte të mëdha infrastrukturore që përfshijnë transportin hekurudhor. Kurti theksoi përparimin ekonomik dhe demokratik të Kosovës, cili sipas tij, është dëshmuar në raportet e organizatave ndërkombëtare. Ai shprehu mirënjohjen për mbështetjen e vazhdueshme të ShBA-së ndaj Kosovës. Turner dhe Norcross janë pjesë e Asamblesë Parlamentare të NATO-s dhe të Komitetit të Shërbimeve të Armatosura të Dhomës së Përfaqësuesve.
