Në ceremoninë e organizuar nga Ambasada e Shqipërisë në Kosovë për 113-vjetorin e Pavarësisë, Kryeministri në detyrë Albin Kurti theksoi thellimin e bashkëpunimit mes dy vendeve.
Ai u shpreh se ky bashkëpunim tashmë matet jo vetëm me nënshkrimin e marrëveshjeve, por me përmirësimin konkret të jetës së qytetarëve.
Sipas Kurtit, gjatë katër viteve të fundit janë nënshkruar 58 marrëveshje të reja, nga gjithsej 184, të cilat kanë prodhuar përfitime të prekshme. Ai përmendi rritjen e shkëmbimeve tregtare, qarkullimin pa pengesa të energjisë dhe përgatitjet për Lojërat Mesdhetare 2030.
Kurti foli edhe për nisma të rëndësishme si hapja e zyrave doganore, heqja e vulës apostile, njohja e pensioneve dhe sigurimeve, si dhe njësimi i diplomave që lehtëson lëvizjen e lirë të qytetarëve.
Në arsim dhe kulturë, theksoi realizimin e abetares unike dhe të enciklopedisë shqiptare. Në fushat e sigurisë, turizmit, bujqësisë dhe drejtësisë, procedurat janë unifikuar për të rritur bashkëpunimin praktik mes dy shteteve.
Kreu i qeverisë në detyrë përfundoi duke thënë se bashkëpunimi i thelluar po i afron Kosovën dhe Shqipërinë më shumë se kurrë.
Sipas tij, kjo qasje e përbashkët kontribuon në një të ardhme më të mirë, me kushte të përmirësuara jetese dhe lidhje më të forta kulturore e ekonomike për qytetarët në të dy anët e kufirit.
