Kryeministri polak Donald Tusk akuzoi Rusinë se po planifikon akte sabotazhi dhe “akte terroriste” kundër linjave ajrore në mbarë botën. Gjatë një konference të përbashkët shtypi me Presidentin ukrainas Volodymyr Zelenskyy në Varshavë, Tusk deklaroi se ekziston shqetësimi për mundësinë e akteve të terrorit kundër aviacionit global, jo vetëm në Poloni, por edhe në shtete të tjera.
Kremlini ka mohuar më parë akuzat perëndimore për rolin e Rusisë në financimin e akteve sabotazhi dhe sulmeve në Evropë. Zyrtarët e sigurisë perëndimore dyshojnë se një kërcënim i mundshëm rus mund të lidhet me disa komplotë që kanë përfshirë vendosjen e pajisjeve shpërthyese në aeroplanët që transportonin mallra për në Amerikën e Veriut, duke përfshirë dy incidente të vitit të kaluar në Gjermani dhe Britani të Madhe, ku aeroplanët u përfshinë nga flakët gjatë ngarkimit të pakove.
Qeveria e Varshavës, që mbështet fort BE-në, e akuzon Rusinë për realizimin e një lufte hibride kundër Polonisë dhe shteteve të tjera perëndimore, duke e parë këtë si një hakmarrje për mbështetje ndaj Ukrainës në luftën e saj kundër agresionit rus. Po ashtu, Polonia ka akuzuar Rusinë dhe Bjellorusinë për orkestrimin e një krize të emigracionit në kufirin lindor të Bashkimit Europian, për të shkaktuar kaos dhe përçarje në Evropë.
Më herët, Polonia ka urdhëruar mbylljen e një prej tre konsullatave ruse si reagim ndaj akteve të sabotazhit, përfshirë zjarrvënie të qëllimshme që, sipas autoriteteve, ishin të porositura nga Moska.
