Në Bashkinë e Mirditës, e cila drejtohet nga Partia Demokratike, nuk është zbatuar ende urdhri i kryeministrit Edi Rama për shkarkimin e drejtuesve të njësive administrative.
Kryetari i Bashkisë, Albert Melyshi, e ka cilësuar këtë urdhër si të padrejtë dhe në kundërshtim me ligjin, duke theksuar se përfaqëson një ndërhyrje në kompetencat e pushtetit vendor. Sipas tij, vlerësimi i performancës së drejtuesve lokalë bëhet çdo tre muaj dhe vendimet për shkarkime merren vetëm mbi këtë bazë.
“Urdhrat e kryeministrit në disa bashki përbëjnë një ndërhyrje të drejtpërdrejtë në kompetencat e qeverisjes vendore. Asnjë ligj nuk i jep të drejtë kryeministrit të urdhërojë shkarkimin e drejtorëve apo administratorëve lokalë. Në Bashkinë e Mirditës, vlerësimi i punës së tyre bëhet çdo tre muaj dhe çdo mosrealizim i detyrave mund të çojë në masa disiplinore, përfshirë edhe shkarkimin,” deklaroi Melyshi për mediat.
Pak javë më parë, kryeministri Rama i kërkoi të gjithë kryebashkiakëve që të largojnë nga detyra nënkryetarët dhe drejtuesit e njësive administrative me performancë të dobët. Megjithatë, ky urdhër nuk është zbatuar në disa bashki, si ajo e Mirditës.
