Sadiq Khan reagoi ashpër ndaj deklaratave të Presidentit amerikan Donald Trump, duke e cilësuar atë “racist, seksist, mizogjin dhe islamofob”.
Replika e tij erdhi pasi Trump, gjatë një fjalimi në Organizatën e Kombeve të Bashkuara, e quajti kryebashkiakun “të tmerrshëm” dhe akuzoi Londrën se po afrohej me zbatimin e ligjit të Sharias.
“Londra është qyteti më i madh në botë, më i sigurt se shumë metropole amerikane, dhe jemi të lumtur të mirëpresim numrin rekord të qytetarëve amerikanë që po vendosen këtu”, tha Khan.
Ai theksoi se kryeqyteti britanik vazhdon të tërheqë vizitorë dhe investitorë nga SHBA.
“Që nga fillimi i regjistrimeve, vetëm në një periudhë kemi pasur më shumë amerikanë që kanë ardhur në Londër. Duhet të ketë një arsye për këtë. Nëse shikoni kriteret e ndryshme, ne shpesh renditemi si qyteti numër një në botë për kulturën, investimet e huaja, sportet dhe mundësitë që u ofrojmë njerëzve për të realizuar potencialin e tyre. Ne jemi qyteti më i madh në botë dhe jam vërtet krenar për këtë”,
shtoi ai, duke kujtuar origjinën e tij si bir emigrantësh pakistanezë.
Nga tribuna e OKB-së, Trump deklaroi se Londra ka ndryshuar shumë për shkak të “emigracionit të pakontrolluar”. Vetëm pak ditë më parë, gjatë kthimit nga vizita e tij shtetërore në Mbretërinë e Bashkuar, ai kishte kritikuar sërish Khan-in, duke e quajtur “një nga kryebashkiakët më të këqij në botë” dhe duke theksuar se kishte kërkuar të mos e ftonin në banketin zyrtar në Kështjellën Windsor.
