Pas shkarkimit të Igor Tudor, Juventusi po përballet me pasoja të rënda financiare për shkak të ndryshimeve të shpeshta në stolin e trajnerëve. Klubi torinez pritet të rrisë ndjeshëm buxhetin e dedikuar për trajnerët, gjë që rrezikon të rëndojë arkën e klubit dhe të ndikojë në lëvizjet e ardhshme në merkato.
Aktualisht, Juventus ka ende në listën e pagave ish-trajnerin Thiago Motta dhe tani duhet të mbulojë edhe kostot për shkarkimin e Tudorit, si dhe pagën e trajnerit të ri që do të marrë drejtimin e skuadrës. Sipas të dhënave financiare, për shkarkimin e Thiago Mottës, klubi ka lënë mënjanë mbi 16.3 milionë euro, të regjistruara në bilancin që përfundon më 30 qershor 2025. Kjo shumë mbulon pagat e trajnerit dhe stafit të tij deri në fund të sezonit 2026/27.
Sa i përket Igor Tudorit, ende nuk ka shifra zyrtare për cost-in e tij, por burime pranë klubit e vlerësojnë pagesën e tij në rreth 5.5 milionë euro bruto në vit, që e çon totalin e mundshëm ndaj klubit deri në mbi 11 milionë euro deri në vitin 2027, pa përfshirë shpenzimet për stafin e tij ndihmës. Pra, nëse as Tudor dhe as Motta nuk arrijnë marrëveshje me klube të tjera, Juventus do të duhet të paguajë rreth 30 milionë euro deri në fund të vitit të ardhshëm vetëm për trajnerët që nuk janë më në stol.
Nëse këtë shumë e shtojmë me pagën e trajnerit të ri dhe të stafit të tij, barrën ekonomike mund të rritet ndjeshëm. Kjo është veçanërisht e vërtetë nëse emri i zgjedhur është Luciano Spalletti, i cili njihet për kërkesat e tij financiare të larta. Kjo situatë ka ngritur shqetësime te drejtuesit e klubit, duke i detyruar ata të rishikojnë strategjitë e tyre për merkato dhe menaxhimin e financave, për të siguruar stabilitetin e klubit në të ardhmen.
