Personi që shihni në foto është Kristjan Kola, 34 vjeç, i cili u ekzekutua mbrëmjen e sotme në qytetin e Shkodrës.
Ngjarja e rëndë ndodhi rreth orës 22:30, në lagjen “Vasil Shanto”, pranë “Kinema Republika”. Kola po qëndronte në ambientet e jashtme të një lokali, kur dy persona të maskuar, që lëviznin me një motor të zi dhe mbanin skafandra, iu afruan dhe hapën zjarr mbi të. Ai mbeti i vdekur në vend.
Pamjet nga vendngjarja, të publikuara më herët, treguan trupin e pajetë të viktimës ende në vendin ku ndodhi atentati, ndërsa zona ishte rrethuar nga forca të shumta policie.
Ngjarja ndodhi në një nga zonat më të survejuara të qytetit, me një numër të madh kamerash sigurie, të cilat pritet të ndihmojnë në identifikimin e autorëve dhe zbardhjen e plotë të ngjarjes.
Menjëherë pas krimit, autorët u larguan me shpejtësi pa lënë gjurmë. Policia ka ngritur pika kontrolli në të gjitha daljet e Shkodrës dhe po zhvillon kontrolle të imta në disa zona të qytetit, me qëllim lokalizimin dhe kapjen e tyre.
Atentati ka shkaktuar panik mes qytetarëve që ndodheshin aty pranë në momentin e ngjarjes. Deri më tani, motivet e vrasjes mbeten të paqarta.
Njoftimi zyrtar i Policisë së Shkodrës:
Shkodër / Informacion paraprak
Rreth orës 22:30, në lagjen “Vasil Shanto”, në rrethana ende të paqarta, dy shtetas ende të paidentifikuar dyshohet se kanë vrarë me armë zjarri shtetasin K. K., 34 vjeç, i cili ishte në ambientet e jashtme të një lokali.
Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorëve.
