Kristjan Asllani, mesfushori i talentuar i Kombëtares Shqiptare, ka lënë shenjën e tij në përballjen e Kupës së Italisë midis Interit dhe Udinezes. Në minutën e 45-të të pjesës së parë, Asllani befasoi portierin kundërshtar me një goditje të jashtëzakonshme nga këndi, duke realizuar një gol spektakolar që ngriti në këmbë tifozët në “San Siro”.
Goli i Asllanit erdhi pasi Marko Arnautovic kishte shënuar golin e parë për Interin në minutën e 30-të, duke i dhënë avantazhin skuadrës së Simone Inzaghit. Interi vazhdon të dominojë ndeshjen me një paraqitje bindëse, ndërsa Udineze duket e pafuqishme për të përballuar presionin e vazhdueshëm të zikaltërve.
Me këtë paraqitje, Asllani konfirmon formën e tij të mirë dhe rolin e rëndësishëm që mund të luajë në skuadrën e Inzaghit gjatë pjesës tjetër të sezonit. Ndeshja vazhdon me Interin në kontroll të plotë dhe në kërkim të një fitoreje bindëse.
