Në një konferencë për shtyp të mbajtur të martën, trajneri i Newcastle, Eddie Howe, ka komentuar thashethemet që lidhin mesfushorin Sandro Tonali me një transferim të mundshëm te Arsenali.
Howe u shpreh se nuk është i befasuar nga spekulimet, por theksoi qartë se klubi nuk ka asnjë plan për ta lënë lojtarin të largohet. “Tonali është një lojtar thelbësor për atë që po ndërtojmë këtu. Ai është shumë i lumtur në Newcastle dhe është krenar që përfaqëson qytetin tonë,” deklaroi trajneri.
I pyetur nëse këto zëra mund ta kenë shqetësuar futbollistin italian, Howe shfaqi optimizëm. Sipas tij, Tonali ka një marrëdhënie shumë të mirë me stafin teknik dhe me bashkëlojtarët. “Është një futbollist i shkëlqyer dhe një person po aq i shkëlqyer. Nuk mendoj se ai është i palumtur, edhe pse ndonjëherë ndodhin gjëra për të cilat nuk jam në dijeni,” shtoi ai.
Trajneri i Newcastle theksoi se është normale që lojtarët e nivelit të lartë të tërheqin interesin e klubeve të mëdha, por nënvizoi se prioriteti i klubit mbetet ruajtja e grupit aktual. “Ne duam ta mbajmë skuadrën të bashkuar dhe të vazhdojmë përpara me stabilitet. Sandro ka një rol shumë të rëndësishëm për ne dhe po punojmë për të arritur nivelin më të lartë të mundshëm,” përfundoi Howe.
