Komisioni Qendror Zgjedhor (KQZ) në Kosovë nuk ka certifikuar Listën Serbe për pjesëmarrje në zgjedhjet e parakohshme parlamentare të 28 dhjetorit, duke shkaktuar reagime të forta nga kjo parti.
Lista Serbe, e cila gëzon mbështetjen e plotë të Beogradit zyrtar dhe të presidentit serb Aleksandar Vuçiq, ka paraqitur ankesë në Panelin Zgjedhor për Ankesa dhe Parashtresa (PZAP), duke kërkuar anulimin e vendimit të KQZ-së.
Kryetari i partisë, Zllatan Elek, akuzoi KQZ-në për shkelje të të drejtave të komunitetit serb në Kosovë dhe e quajti vendimin një “përjashtim të padrejtë” nga procesi demokratik.
“KQZ-ja në Prishtinë po shkel të drejtat e popullit serb dhe nuk e lejon Listën Serbe të marrë pjesë në zgjedhje. Kjo është hera e tretë që na mohohet e drejta për përfaqësim politik,” deklaroi Elek, duke shtuar se partia e tij ka dhjetë kryetarë komunash në zonat me shumicë serbe.
Ai e akuzoi qeverinë e Albin Kurtit se po përpiqet të pengojë pjesëmarrjen e Listës Serbe në zgjedhje dhe të kufizojë përfaqësimin politik të serbëve të Kosovës.
