Agjencia e Ushqimit dhe Veterinarisë (AUV) e Kosovës ka vendosur një ndalim të pakohshëm për importin e deleve dhe dhive nga qarqet e Shkodrës dhe Kukësit në Shqipëri, pas konfirmimit të shpërthimit të sëmundjes PPR (Peste des Petits Ruminants), e njohur ndryshe si murtaja e ruminantëve të vegjël.
Sipas njoftimit zyrtar, sëmundja është konfirmuar tek dhitë në zonën e Shkodrës dhe përbën rrezik të lartë për përhapje te bagëtitë e imta.
Në këtë kuadër, autoritetet kufitare të Kosovës do të forcojnë kontrollet në të gjitha pikat kufitare me Shqipërinë për të parandaluar futjen e sëmundjes në territorin kosovar.
AUV sqaron se PPR është një sëmundje virale që prek kryesisht dhitë dhe delet, dhe transmetohet përmes kontaktit të drejtpërdrejtë me kafshë të infektuara, përmes sekrecioneve dhe jashtëqitjeve. Shenjat klinike përfshijnë temperaturë të lartë, rrjedhje nga hundët, inflamacion të syve, humbje oreksi, diarre dhe në raste të rënda, ngordhje.
Megjithatë, AUV thekson se kjo sëmundje nuk transmetohet te njerëzit dhe nuk paraqet rrezik për shëndetin publik.
Autoritetet veterinarë do të ndjekin situatën nga afër dhe premtojnë njoftime të rregullta për fermerët dhe publikun, si dhe zbatim të masave parandaluese në bashkëpunim me institucionet e tjera përkatëse.
