Kosova e mbylli me zhgënjim përballjen vendimtare ndaj Turqisë, duke u mposhtur 1-0 dhe duke humbur mundësinë për të siguruar një vend në Botëror. Dardanët zhvilluan një ndeshje të mirë, me shumë shpirt gare dhe disa raste të pastra, por në fund fati dhe mungesa e konkretizimit bënë diferencën.
Momenti më i dhimbshëm i takimit erdhi në pjesën e parë, kur Fisnik Asllani provoi me një goditje të fortë, por portieri turk e devijoi topin që më pas u përplas në traversë. Në vazhdim të aksionit, Vedat Muriqi nuk arriti ta shtyjë topin në rrjetë, edhe pse porta ishte pothuajse e boshatisur. Ishte rasti më i artë i Kosovës për të ndryshuar fatin e sfidës.
Në pjesën e dytë, Turqia goditi dhe gjeti golin e fitores, ndërsa Kosova provoi të reagojë dhe krijoi sërish disa mundësi të mira. Megjithatë, dardanëve u mungoi goditja e fundit dhe ndeshja u mbyll me humbje, duke i dhënë fund ëndrrës për Botërorin. Pavarësisht rezultatit, Kosova la përshtypjen e një skuadre që luftoi fort dhe që meritonte më shumë nga kjo sfidë.
