Ajo e mbrëmjes së 7 qershorit nuk është një ndeshje si gjithë të tjerat. Kur Shqipëria përballet me Serbinë në “Arena Kombëtare”, ora ndalon për të gjithë ata që e ndjejnë këtë fanellë si pjesë të identitetit, jo thjesht të sportit. Ndërsa tensioni vjen duke u rritur për shkak të historisë, simbolikës dhe ngarkesës që e rrethon këtë duel, një zë i urtë dhe i respektuar ka zgjedhur të flasë ndryshe; Mërgim Mavraj.
Një nga figurat më të dashura të kombëtares, me rrënjë nga Kosova dhe një karrierë që e ka bërë simbol të profesionalizmit e dinjitetit, Mavraj ka lëshuar një mesazh që shkon përtej fushës. “Kosova është jona, përgjithmonë”, – ka thënë ai me krenari, por ka shtuar menjëherë: – Çuna, lufta ka mbaru. Tani luani futboll!”
Kjo është një thirrje që vjen nga dikush, i cili i ka përjetuar nga afër ndeshjet e shndërruara në beteja simbolike. Ai ishte në fushë në Beograd më 2014, kur flamuri me dronin shpërtheu gjithçka. Ai ka ndier në trup kërcënimet, tensionet, shikimet e egra. Por sot, Mërgimi kërkon pjekuri, jo hakmarrje; qetësi, jo shpërthim emocional. Kjo është ajo që e bën një kombëtare të madhe; kur në vend të zemërimit zgjedh mençurinë, në vend të kaosit zgjedh disiplinën.
