Koreja e Jugut dhe Shtetet e Bashkuara kanë finalizuar detajet e një marrëveshjeje të re tregtare, që pritet të ndryshojë ndjeshëm marrëdhëniet ekonomike ndërmjet këtyre dy vendeve. Ky informacion u bë publik nga Kim Yong-beom, shefi i stafit presidencial për politikat, pas një takimi dypalësh midis Presidentit të Koresë së Jugut, Lee Jae Myung, dhe Presidentit amerikan Donald Trump në kuadër të samitit të APEC-ut.
Marrëveshja përfshin një ulje të tarifave për automjetet koreano-jugore në nivelin 15%, duke e barazuar këtë tarifë me atë që gëzon Japonia. Një pike kyçe e marrëveshjes është gjithashtu një nivel më i favorshëm tarifor për gjysmëpërçuesit, në krahasim me Tajvanin, një rival të rëndësishëm në këtë sektor.
Një tjetër temë e rëndësishme e debatit ka qenë paketa e investimeve prej 350 miliardë dollarësh, e kërkuar nga Trump më parë, ku 200 miliardë dollarë do të jepen në para të gatshme, ndërsa 150 miliardë dollarë do të investohen në projekte bashkëpunimi për ndërtimin e anijeve, që do të drejtohen nga kompani koreano-jugore. Kim theksoi se investimet do të realizohen në një periudhë të caktuar, të shpërndara me një kufi prej 20 miliardë dollarësh në vit, duke iu përgjigjur nevojave të biznesit dhe që synojnë të ndihmojnë në menaxhimin e ndikimeve mbi tregun e këmbimit valutor, një shqetësim i rëndësishëm për Seulin.
Marrëveshja e re është parë si një hap i rëndësishëm për forcimin e partneritetit ekonomik midis SHBA dhe Koresë së Jugut, pas muajsh negocimi dhe debateve mbi balancën tregtare mes të dy vendeve. Kjo marrëveshje e re pritet të sjellë përfitime të ndërsjella dhe të kontribuojë në stabilizimin e marrëdhënieve ekonomike në rajon.
