Drejtoria e Burgjeve ka urdhëruar kontroll urgjent në qelinë e Fatmir Pjetrit në Burrel, pas publikimit në Instagram të një audioregjistrimi ku ai akuzon institucionin se i ka ndaluar botimin e një romani për shkak të dhunës. Kontrolli synon të zbulojë si është realizuar regjistrimi dhe postimi.
Pjetri, i njohur si pjesë e “Bandës së Babagjyshëve”, ka tentuar arratisjen në vitin 2025 nga burgu 313 bashkë me Arbër Çekajn, duke përdorur çarçafë si litar. Gjatë tentativës ai ka goditur me hekur dy punonjës burgu, por është neutralizuar. Të dy akuzohen për “largim nga vendi i qëndrimit”.
Në audioregjistrimin, Pjetri thekson se po diskriminohet përsa i përket librit që ka shkruar. Sipas tij, Drejtoria e Përgjithshme e Burgjeve nuk e ka lejuar të promovojë librin “Jetë e guximshme”, pasi përmban akte dhune.
40-vjeçari nga Puka është i dënuar më parë në Greqi dhe ka marrë pjesë në disa grabitje në Shqipëri, përfshirë një grabitje të bujshme në një qendër tregtare në Tiranë.
