Një përplasje e vazhdueshme mes dy komshinjve në fshatin Kozarë të Kuçovës, që zgjat prej më shumë se 30 vitesh, ka degraduar së fundmi në një incident të dhunshëm të filmuar nga kamerat e emisionit “Tak Fak”.
Në qendër të konfliktit është një kufi toke një shenjë ndarëse mes pronave të dy familjeve, Salla dhe Avrami që është zhvendosur sipas pretendimeve të njërës palë, duke ndezur një konflikt që herë pas here ka kërkuar edhe ndërhyrjen e policisë.
Teksa gazetarja e “Tak Fak”, shoqëronte denoncuesen Lume Salla në terren për të dokumentuar kufirin e diskutueshëm, në fushë shfaqet komshiu Maksim Avrami së bashku me bashkëshorten e tij.
Sipas pamjeve të publikuara nga emisioni, situata tensionohet menjëherë. Maksimi, i acaruar, i drejtohet me fjalor të rëndë fqinjës së tij dhe gazetares. Pastaj e pështyn dhe e shtyn Lumen duke e hedhur në një kanal.
Lumja, pavarësisht dhunës, nuk reagon fizikisht, por vijon të mbrojë qetësisht pretendimet për kufirin e zhvendosur. Në përpjekje për të shmangur përshkallëzimin e situatës, gruaja e Maksimit ndërhyn dhe e tërheq të shoqin nga vendi i ngjarjes.
Por Maksimi nuk ndalet, duke vazhduar me ofendime dhe kërcënime për të larguar fqinjën nga prona që ai e konsideron të tijën, edhe pse kufiri është ende subjekt mosmarrëveshjeje dhe pa zgjidhje ligjore të qartë./News24
Klikoni Videon
