Policia e Lezhës ka arrestuar dy prej katër personave të shpallur në kërkim, lidhur me konfliktin e ndodhur më datë 11 prill.
Në pranga ranë Redian Margjonaj, 20 vjeç dhe A.D, 15 vjeç. Të dy këta shtetas dyshohen për kryerjen e veprave penale “Plagosje e rëndë me dashje”, kryer në bashkëpunim, dhe “Prishja e qetësisë publike”. Policia ka gjetur dhe sekuestruar në cilësinë e provës materiale automjetin e përdorur në këtë ngjarje. Gjithashtu, në vijim të veprimeve të thelluara hetimore, është shpallur në kërkim një tjetër 15-vjeçar, shtetasi G. P., banues në Lezhë, i përfshirë në konflikt.
Në kërkim vijojnë të jenë edhe shtetasit Kevin Ndoka, 20 vjeç, dhe A.M., 17 vjeç.
Më datë 11.04.2025, në orën 12:02, në qytetin e Lezhës, shtetasit Fatjon Gjini, dhe Ervin Nika, kanë goditur me mjete të forta shtetasin Redian Margjonaj, ku më pas Margjonaj, bashkë me tre shokët e tij, (të 4 të shpallur në kërkim) kanë goditur me automjet shtetasin Fatjon Gjini dhe më pas e kanë goditur me mjete të forta, duke i shkaktuar dëmtime fizike.
Vijojnë hetimet për identifikimin dhe lokalizimin e personave të tjerë të përfshirë në këtë konflikt./
