Konferenca e tretë ndërqeveritare, Rama nga Brukseli: Synojmë hapjen e të gjithë grupkapitujve vitin e ardhshëm

Kryeministri Edi Rama ditën e sotme ndodhet në Bruksel në kuadër të koneferëncës së tretë ndërqeveritare mes Shqipërisë dhe BE-së. Rama duke folur nga Brukseli tha se hapja e negociatave për “Marrëdhëniet me jashtë” është një hap i rëndësishëm për Shqipërinë.

Ai theksoi se do të vazhdojnë para dhe ambicia është të hapin më shumë grupkapituj deri në pranverë. Sipas tij nëse hapen më shumë grupkapituj deri në pranverë do të jenë më të sigurt që vitin e ardhshëm të mbarojnë me hapjen e kapitujve. 

“Marshi ynë vazhdon! Jemi këtu për të ndërmarrë një hap të ri të rëndësishëm dhe për të hapur një grupkapitull të ri, i cili është shumë, shumë i rëndësishëm për planin tonë, sepse është një hap që po bëhet sipas planit. Dhe po, duhet të vazhdojmë përpara dhe ambicia jonë është të hapim më shumë grupkapituj, shpresojmë në pranverë, dhe pastaj të sigurohemi që viti i ardhshëm të mbyllet me grupkapitujt e hapur. Është me të vërtetë një ditë shumë e mirë për vendin tonë dhe një hap shumë motivues për të gjithë ne.”, tha Rama