Tiranë – Një klinikë dentare në Rrugën e Kavajës është vënë nën hetim pas një operacioni policor që zbuloi përdorimin e preparateve të skaduara në shërbimet dentare. Si rezultat i operacionit të koduar “Siguria Dentare”, janë arrestuar në flagrancë administratori i klinikës, shtetasi E. Z., 40 vjeç, dhe një nga stomatologët, shtetasi K. M., 26 vjeç.
Sipas Policisë së Shtetit, gjatë kontrollit janë sekuestruar materiale dhe preparate dentare të skaduara që përdoreshin për terapi, ortodoncë, kirurgji, ura porcelani, proteza, implante dhe riparime aparaturash.
Po ashtu, 12 punonjës të tjerë të klinikës janë proceduar penalisht në gjendje të lirë, për përfshirje në këtë aktivitet të paligjshëm.
Çështja tashmë është në duart e Prokurorisë së Tiranës, dhe hetimet po vijojnë për veprat penale “Prodhimi dhe tregtimi i barnave dhe pajisjeve mjekësore të falsifikuara ose të rrezikshme për jetën dhe shëndetin”, “Punësimi i paligjshëm” dhe “Fshehja e të ardhurave”.
Policia njofton se kontrollet në klinikat dentare do të vijojnë, me qëllim garantimin e sigurisë së pacientëve dhe parandalimin e shkeljeve në fushën e shëndetësisë.
