Këshilli i Lartë Gjyqësor (Këshilli i Lartë Gjyqësor) ka reaguar mbrëmjen e sotme lidhur me informacionet e publikuara për gjyqtaren e GJKKO-së, Irena Gjoka, sipas të cilave ajo rezulton e dënuar në Greqi për falsifikim dokumentesh.
Në një njoftim zyrtar për mediat, KLGJ bën të ditur se deri në orën 20:30 të datës 20 janar 2026, në adresë të institucionit nuk ka mbërritur asnjë shkresë zyrtare nga Prokuroria e Përgjithshme lidhur me këtë çështje.
“Sapo shkresa e Prokurorisë së Përgjithshme të mbërrijë zyrtarisht, ajo do të administrohet nga Komisioni i Zhvillimit të Karrierës në KLGJ dhe më pas do të ndiqet procedura përkatëse ligjore”, thuhet në reagimin e KLGJ-së.
Sipas ligjit, KLGJ është institucioni kompetent për të vlerësuar nëse, pas verifikimeve të thelluara nga sektori i dekriminalizimit në Prokurorinë e Përgjithshme, gjyqtarja Irena Gjoka gjendet ose jo në kushtet e ndalimit për ushtrimin e funksionit si gjyqtare e posaçme.
Më herët gjatë ditës, Prokuroria e Përgjithshme deklaroi se i ka përcjellë KLGJ-së vendimin autentik të autoriteteve greke, si edhe vendimin e arkivimit të prokurorit grek lidhur me këtë çështje, për shkak të mos-ekzekutimit të dënimit.
Çështja e gjyqtares së posaçme Irena Gjoka lidhet me një dënim penal të vitit 2005 në Greqi për “falsifikim vizash”, i cili nuk është deklaruar prej saj në formularin e Dekriminalizimit.
