Gjatë kësaj vere është vënë re një shtim i ndjeshëm i rasteve të pickimeve nga gjarpërinjtë, të cilët janë bërë më aktivë për shkak të temperaturave të larta dhe mungesës së ujit. Si pasojë, çdo javë në urgjencën e QSUT paraqiten mesatarisht të paktën tre pacientë të pickuar nga gjarpërinjtë, shumica prej tyre nga zona rurale.
Së fundmi, është shënuar edhe një rast i rrallë i pickimit nga merimanga e zezë. Një 19-vjeçar nga Cërriku është paraqitur në urgjencë me komplikacione serioze kardiake, si pasojë e helmimit nga ky insekt.
Drejtoresha e Operatorit të Kujdesit Shëndetësor, Jeta Deda, bëri të ditur se janë marrë masa për pajisjen e qendrave shëndetësore verore me medikamentet e nevojshme për trajtimin e këtyre rasteve, sidomos në zonat më të ekspozuara.
Ekspertët shpjegojnë se për shkak të thatësirës së zgjatur, përqendrimi i helmit si tek gjarpërinjtë ashtu edhe tek merimangat është rritur, duke e bërë atë më të fuqishëm dhe më të rrezikshëm për shëndetin e njeriut.
Ndërsa për insektet si mushkonjat ndërmerren fushata dezinsektimi, për gjarpërinjtë nuk është e lejuar përdorimi i kimikateve, me qëllim ruajtjen e faunës dhe ekosistemit natyror.
