Analisti Andi Bushati, i ftuar në emisionin “Të Paekspozuarit” ka folur për kabinetit e ri qeveritar “Rama 4”.
Bushati tha se qeveria nuk është e shqiptarëve dhe e Partisë Socialiste, por një qeveri personale e Edi Ramës, që caktoi disa persona, në poste të cilat as nuk ua kishte thënë më parë. Bushati quajti si “fituese më të madhe” nga kabineti i ri, Belinda Ballukun, që arriti të mbajë të dyja postet e saj, por edhe Petrit Malajn dhe Pirro Vengun në kabinet, të cilët mendohet se janë njerëzit e saj.
“E para, kjo nuk është as qeveri e shqiptarëve dhe as e PS, por personale, ai ka mbledhur kë ka dashur. Kush hap pak sytë dhe ka parë si bëhen qeveritë në një vend demokratik perëndimor, bëhen me diskutime brenda partive, përfaqësojnë flukse brenda partive, ekuilibra të ndryshme. Kjo është fshirë këtu.
E dyta, është një qeveri me kukulla qesharake. Njerëz që pretendohen të drejtojnë politikat e këtij vendi, as nuk janë pyetur, a e bëjnë dot këtë punë. E kanë marrë vesh në sallë. Te rasti i Manastirliut, e tregoi dhe tha se po habitet Ogerta. Mbase në një botë normale, Ogerta mund të thoshte nuk jam gati. Rama i zhvesh këta nga minimumi i dinjitetit.
Fituesja e madhe e këtij kompozimi, Belinda Balluku. Ajo jo vetëm ndejti zëvendëkryeministre, por ruajti ministrinë, madje ruajti dhe dy nga njerëzit e vet që ka imponuar, Pirro Vengun dhe Petrit Malajn. Do të thuash, me çfarë kriteri? Ishte hajdutja më e fortë e zgjedhjeve? Ishte hajdute më e madhe se Taulant Balla që kishte diasporën? Jo. Pra as kjo nuk ka kriter. Thjesht ka marrë më shumë pushtet“, deklaroi Bushati.
