Një ngjarje tronditëse ka ndodhur mbrëmjen e djeshme në fshatin Frashër të Fierit, ku një 26-vjeçare, Emanilda Rama, ka vrarë të atin, 56-vjeçarin Anesti Rama, duke e mbytur me tel. Ngjarja dyshohet të ketë qenë e planifikuar, pasi disa ditë më parë, nënë e bijë e kishin dërguar viktimën për vizitë te kardiologu, me qëllim që të krijonin një justifikim për vdekjen e mëvonshme.
Krimi ndodhi rreth orës 23:00, ndërsa policia u njoftua vetëm pas mesnate, rreth orës 01:00. Në momentin e mbërritjes në banesë, efektivët vunë re shenja dhune në trupin e viktimës, konkretisht mavijosje në qafë, çka ngriti dyshime për një vdekje jo natyrale.
Fillimisht, Emanilda ka deklaruar në polici se i ati kishte rrëshqitur në tualet dhe kishte ndërruar jetë. Ajo dhe nëna e saj më pas e kishin larë dhe veshur trupin. Por, pas disa orësh marrje në pyetje, 26-vjeçarja ka pranuar krimin, duke pohuar se vetë e kishte mbytur të atin me tel.
Në dëshminë e saj, Emanilda Rama ka treguar se kishte një marrëdhënie të tensionuar me të atin, të cilin e përshkroi si fanatik dhe kontrollues. Sipas saj, ai nuk e lejonte të vishej në mënyrë bashkëkohore apo të shoqërohej lirisht, duke i shkaktuar presion të vazhdueshëm psikologjik. Ajo ka mohuar të ketë qenë e dhunuar fizikisht, por ka theksuar se ndjehej e shtypur nga mënyra si e trajtonte i ati.
“Nuk më blinte asgjë, i mbante lekët për vete. Ma kishte nxirë jetën”, është shprehur ajo gjatë dëshmisë. Ndërkohë, policia vijon hetimet për të zbardhur plotësisht rrethanat e ngjarjes.
