Bashkimi Evropian (BE) do të mbajë bisedime të nivelit të lartë më 15 dhjetor për të diskutuar ndikimin e rritjes së mbështetjes së Kinës për Rusinë në kuadër të luftës në Ukrainë. Në këtë takim, ministrat e jashtëm të 27 vendeve anëtare do të shqyrtojnë informacionet e fundit mbi mundësinë e dërgesave të armëve kineze në Rusi, të cilat, nëse vërtetohen, do të tregonin një nivel të ri mbështetjeje nga Pekini për Moskën.
Një diplomat i BE-së tha se pa këtë mbështetje kineze, Rusia ndoshta nuk do të ishte në gjendje të vazhdonte ofensivën e saj. Kjo është veçanërisht e rëndësishme duke pasur parasysh që Kina ka qenë një furnizues i rëndësishëm i komponentëve për industrinë ruse të dronëve, e cila luan një rol kritik në operacionet luftarake në Ukrainë.
Pekini vazhdon të deklarojë neutralitetin e tij në këtë konflikt, duke insistuar se nuk ka dërguar armë në Rusi. Megjithatë, marrëdhëniet e tij me Moskën janë thelluar, veçanërisht në sektorin energjetik, ku Kina është një nga blerësit më të mëdhenj të naftës ruse. Në korrik, BE e akuzoi Kinën dhe Hong Kongun për 80% të shmangieve të sanksioneve ndaj Rusisë.
Përveç shqetësimeve mbi armët, ministrat e jashtëm të BE-së do të shqyrtojnë dhe çështje të tjera të rëndësishme, si kontrollin e eksporteve kineze mbi mineralet e rralla, sigurinë në Ngushticën e Tajvanit dhe tensionet gjeoekonomike që lidhen me prodhuesin e çipave Nexperia. Ministret e Jashtëm të Francës dhe Gjermanisë gjithashtu do t’i informojnë kolegët e tyre për vizitat e fundit në Pekin, ku diskutuan mbi marrëdhëniet e ngushta Kina-Rusi.
Komunikimet nga liderët kinezë, përfshirë komentin e Wang Yi, minister i Jashtëm të Kinës, se Pekini nuk mund të pranojë mposhtjen e Rusisë, tregojnë një qëndrim të qartë për të mbrojtur interesat ruse, duke theksuar se çdo humbje e Moskës do t’i hapte rrugë Uashingtonit për të u fokusuar më shumë në Kinë. Këto zhvillime do të jenë thelbësore për politikën e jashtme evropiane dhe lidhjet me Pekinin në të ardhmen.
