Pas arrestimit të shtunën, më 5 korrik, nga policia zvicerane në aeroportin e Zyrihut, për reperin e njohur shqiptar Noizy është kërkuar masa e paraburgimit.
Sipas medias “Watson.ch”, ndalimi i tij është bërë me urdhër të Zyrës së Prokurorit Publik për Krime të Rënda të Dhunshme, e cila ka kërkuar ndaj tij masën e paraburgimit.
38-vjeçari dyshohet për disa vepra penale, por deri më tani nuk është marrë asnjë vendim përfundimtar. Ai gëzon ende prezumimin e pafajësisë, derisa drejtësia të shprehet zyrtarisht.
Noizy kishte planifikuar të performonte në klubin Rinora 4 në Rümlang, por arrestimi i papritur e bëri të pamundur zhvillimin e eventit. Të gjitha njoftimet në rrjetet sociale janë fshirë menjëherë pas ndalimit të tij.
Artisti ka një ndjekje të madhe në platformat digjitale, me afro katër milionë ndjekës në Spotify dhe mbi dy milionë në Instagram. Ai ka qenë gjithashtu në skenë me kryeministrin Edi Rama gjatë fushatës dhe pas rizgjedhjes së tij.
Që nga e shtuna, Noizy ndodhet në Zvicër në pritje të vendimit të autoriteteve, ndërsa prezantimi i albumit të tij të ri është ndërprerë përkohësisht.
