Deputeti i Partisë Demokratike, Belind Këlliçi, i ftuar në emisionin ‘Task Force’ me Sonila Meçon në SYRI TV, foli për situatën politike dhe zgjedhjet e shpallura nga presidenti për bashkinë e Tiranës.
Gjatë bisedës, Këlliçi e cilësoi dekretin e presidentit Bajram Befaj si antikushtetues dhe theksoi se vendi nuk ka më standarde zgjedhore.
‘Çështja është tek Tirana. Që dekreti i presidentit është në shkelje të Kushtetutës, nuk ka njeri normal që nuk arrin ta kuptojë. Problemi është që ne vijojmë ende ta trajtojmë situatën politikisht dhe juridikisht sikur jemi në një vend normal, me demokraci funksionale, shtet të drejtës dhe a duhet bërë ankimi në Gjykatën Kushtetuese, a duhet ndjekur në Gjykatë Administrative siç pretendojnë juristët e presidencës, apo si duhet zgjidhur kjo çështje, e ky debat,’ deklaroi Këlliçi.
Deputeti demokrat akuzoi mazhorancën për shkatërrimin e çdo standardi zgjedhor.
‘Në këtë situatë na ka sjellë kjo mazhorancë. Sot kemi të shkallmuar çdo standard zgjedhjesh në Shqipëri, përfshirë dhe garancitë juridike që të jep procesi. Sot që ne flasim nuk ka ma proces në Shqipëri. Sot që ne flasim farsa vijon e thellohet. Nëse nuk denoncojmë farsën e 11 Majit, farsa e radhës do të jetë edhe më e thellë, sepse ky është ligji i farsave në çdo vend që mban farsa,’ u shpreh ai.
Këlliçi theksoi se data e zgjedhjeve është vendosur për interesa të ngushta politike të Edi Ramës dhe për balancat e brendshme brenda Partisë Socialiste.
‘Ka dy qasje shumë të forta për situatën ku ndodhemi. Të gjithë biem dakord se kemi të bëjmë me një vendim antikushtetues, data e zgjedhjeve është vënë aty në shkelje të ligjit për të plotësuar planet politike, apo balancat e luftës së brendshme politike brenda PS. Kushdo që mendon ndryshe apo që ka patur ndonjë pikëpyetje sot e ka përgjigjen se i gjithë ky skenar është i Edi Ramës, për të çuar përpara axhendën e tij politike në Tiranë, për të vendosur aty një kukull të radhës, siç është Ogerta Manastirliu,’ deklaroi ai.
