Komisioni i Ankimeve dhe Sanksioneve po zhvillon sot seancën ku do të shqyrtohet ankimi i Partisë Demokratike për rezultatin e zgjedhjeve në qarkun e Shkodrës. Përfaqësuesi ligjor i PD-së, Marash Logu, gjatë fjalës së tij në seancë, theksoi se zgjedhjet e mbajtura më 11 maj 2025 në qarkun e Shkodrës janë shoqëruar me shkelje të rënda ligjore.
Logu u shpreh se blerja e votës, përdorimi i mjeteve shtetërore dhe intimidimi i votuesve kanë qenë fenomene të përhapura jo vetëm në Shkodër, por edhe në qarqe të tjera. Më tej shtoi se dosja me shkeljet është depozituar në SPAK, ku janë nisur hetime, përfshirë sekuestrimin e celularëve të zyrtarëve lokalë dhe arrestimin e disa personave të lidhur me mazhorancën.
“Më 11 maj 2025 kanë ndodhur shkelje të rënda të ligjit, të cilat, në vlerësimin tonë, kanë cenuar rëndë integritetin e procesit zgjedhor dhe detyrimisht imponojnë shpalljen e pavlefshmërisë dhe përsëritjen e zgjedhjeve në këtë qark. Sa i përket shkeljeve konkrete, ato janë të njëjta me shkeljet që kemi pasur mundësi të evidentojmë edhe në qarqe të tjera, pasi është e qartë se shkeljet nuk ndryshojnë në kategori, por ndryshojnë vetëm emrat e personave që i kryejnë ato.Në qarkun e Shkodrës janë angazhuar, së pari, kryetarët e bashkive të Partisë Socialiste, më pas të gjithë përfaqësuesit e administratës lokale, me qëllim manipulimin dhe falsifikimin e zgjedhjeve. Fenomen i përsëritur në qarkun e Shkodrës, por edhe në qarqe të tjera, është blerja e votës dhe përdorimi i personave me precedentë kriminalë.Në zgjedhjet e 11 majit 2025, në qarkun e Shkodrës u raportua me shqetësim blerja e votës, si dhe përdorimi i personave me precedentë penalë. Këto praktika u denoncuan nga opozita, media dhe organizata ndërkombëtare, duke ngritur pikëpyetje të mëdha mbi integritetin e procesit. Ashtu siç është bërë e ditur, SPAK ka regjistruar disa procedime penale, ka arrestuar disa individë të mazhorancës dhe ka sekuestruar, në cilësinë e provës, aparate celulare – përfshirë edhe celularin e kryetarit të Bashkisë Vau i Dejës, për korrupsion zgjedhor.”, u shpreh Logu.
