Pas dështimit të projektit të inceneratorëve, kryeministri Edi Rama ka shpallur një iniciativë të re për menaxhimin e mbetjeve në Shqipëri.
Sipas tij, do të krijohet një operator kombëtar, i cili do të marrë përgjegjësinë për grumbullimin dhe trajtimin e mbetjeve në të gjithë vendin.
Në një deklaratë për mediat, Rama theksoi se ky ndryshim ka si synim përqendrimin e procesit të menaxhimit të mbetjeve dhe zhvendosjen e përgjegjësisë nga bashkitë në një strukturë të vetme kombëtare.
“Një ndërmarrje e re që do të jetë në dispozicion të të gjithë republikës, në dispozicion të pushtetit vendor, duke përqendruar të gjithë procesin e trajtimit të mbetjeve,” tha Rama.
Ai shtoi se bashkitë do të funksionojnë si klientë të këtij operatori kombëtar, ndërsa qeveria po përgatit një paketë të re reformash dhe masash, përfshirë një projektligj të ri për menaxhimin e integruar të mbetjeve.
Ky ndryshim, sipas kryeministrit, është i nevojshëm pasi, megjithë përmirësimet në pastrim, qytetarët nuk kanë treguar mjaftueshëm vetëdijesim për trajtimin e mbetjeve.
