Një ton blu gjigant, i cili mund të sigurojë ushqim për rreth 1000 persona, është kapur aksidentalisht në brigjet jugore të Anglisë.
Ngjarja ndodhi rreth 6,5 kilometra nga bregu i Dartmouth-it, Devon, ku peshkatari 59-vjeçar Jonathan Simper ishte në det me të birin, Harry, 29 vjeç, dhe një anëtar të ekuipazhit, Wayne Adams. Ata vunë re peshkun gjigant prej 2,4 metrash të ngecur në rrjetë.
Fillimisht, peshkatarët kishin menduar ta lironin, pasi tonët blu janë specie e mbrojtur, por peshku kishte ngordhur tashmë. Për këtë arsye, ai u soll në portin e Brixham-it, ku u përdor një vinç për ta ngritur nga varka.
Peshku, me peshë rreth 201 kilogramë, u shit më pas për rreth 2100 euro një tregtari me shumicë.
“Jemi shumë të kënaqur me çmimin e shitjes, por ishte një bonus i papritur. Një ngjarje që ndodh vetëm një herë në jetë,” tha Simper, i cili prej 15 vitesh merret me peshkim.
Tonët blu mund të arrijnë deri në 3 metra gjatësi dhe peshë deri në 400 kilogramë, duke qenë një nga grabitqarët më të fuqishëm të oqeanit. Ata arrijnë shpejtësi deri në 70 km/h gjatë ndjekjes së presë, ndërsa të rriturit nuk kanë grabitqarë natyralë përveç njeriut.
Kjo specie ishte zhdukur nga ujërat britanike që nga vitet 1960 për shkak të mbipeshkimit, por vitet e fundit popullsia e tyre është rritur sërish. Në vitin 2021, tonët blu u hoqën nga lista e specieve të rrezikuara.
