Zëvendëspresidentja e Venezuelës, Delcy Rodriguez deklaroi se qeveria nuk ka informacion mbi vendndodhjen e presidentit Nicolas Maduro dhe bashkëshortes së tij, Cilia Flores, pas bombardimeve të ndodhura në orët e para të mëngjesit të kësaj të shtune nga SHBA-të.
Ajo u shpreh në një intervistë në televizionin shtetëror se autoritetet kërkojnë prova të menjëhershme për jetën dhe vendndodhjen e presidentit dhe bashkëshortes së tij.
Deklarata e saj erdhi pak pas momentit kur presidenti amerikan Donald Trump tha se Nicolás Maduro, së bashku me bashkëshorten e tij, është kapur dhe është nxjerrë jashtë vendit me aeroplan.
REAGIMI I TRUMP:
Shtetet e Bashkuara të Amerikës kanë kryer me sukses një sulm në shkallë të gjerë kundër Venezuelës dhe udhëheqësit të saj, Presidentit Nicolas Maduro, i cili, së bashku me gruan e tij është larguar me aeroplan nga vendi. Ky operacion u krye në bashkëpunim me forcat e rendit të SHBA-së. Do të ketë një konferencë për shtyp sot në Mar-a-Lago. Faleminderit për vëmendjen tuaj ndaj kësaj çështjeje! President DONALD J. TRUMP”.
