Në Gjykatën Themelore në Prishtinë, u mbajt sot seanca gjyqësore për Faton Klinakun dhe Nuredin Selmanin, të akuzuar për kanosje ndaj kryeministrit në detyrë Albin Kurti. I pranishëm në seancë ishte edhe Kurti si viktimë e rastit.
Të dy të akuzuarit, Klinaku dhe Selmani, deklaruan pafajësinë e tyre. Klinaku theksoi se nuk sheh ndonjë vepër penale dhe se nuk pranon fajësinë. “Konsideroj se nuk ka vepër penale, nuk bëhet fjalë për kurrfarë kanosje dhe nuk e pranoj,” tha ai. Në të njëjtën linjë u shpreh dhe Selmani, i cili u përgjigj shkurt se “Jo, nuk e pranoj” akuzën.
Pas paraqitjes së akuzave, Albin Kurti shpjegoi se nuk ka angazhuar avokatë dhe se do ta përfaqësojë veten në këtë rast. Ai gjithashtu konfirmoi se nuk do të kërkojë ndihmë pasurore-juridike për dëmshpërblim.
Gjatë seancës, gjyqtari Rrahman Beqiri theksoi se, nëse të akuzuarit nuk pranojnë fajësinë, avokatët e tyre, Ramë Dreshaj dhe Labinot Vata, kanë një periudhë prej 30 ditësh për të paraqitur kundërshtimin e provave. Klinaku dhe Selmani akuzohen nga Prokuroria Themelore e Prishtinës për kanosje ndaj kryeministrit Kurti të ndodhur në datën 30 gusht 2023 përmes platformave të rrjeteve sociale.
