Programi Botëror i Ushqimit (WFP/PAM) njoftoi sot se rreth 15 kamionët e tij u plaçkitën në pjesën jugore të Rripit të Gazës, ku ndihmat humanitare po hyjnë përsëri në mënyrë të kufizuar, pas më shumë se dy muajsh bllokade izraelite.
Në të njëjtën kohë, shërbimi i mbrojtjes civile i Gazës raportoi për të paktën 16 të vrarë sot nga “sulmet izraelite në disa zona të Rripit të Gazës”.
Ushtarakët intensifikuan bombardimet dhe operacionet tokësore në mes të majit me qëllim të deklaruar eliminimin e Hamasit dhe lirimin e pengjeve që u rrëmbyen gjatë sulmit të paprecedentë të lëvizjes palestineze islamiste në Izrael më 7 tetor 2023, pas të cilit shpërtheu lufta.
Dërgesat e ndihmave në Rripin e Gazës rifilluan të hënën për herë të parë që nga 2 marsi, në një kohë kur zemërimi ndaj bllokadës izraelite, që ka shkaktuar mungesa të mëdha ushqimesh dhe barnash, po rritet.
Në një njoftim, PAM njoftoi sot se 15 kamionët e tij “u plaçkitën natën e së enjtes ndaj së premtes në pjesën jugore të Gazës, teksa po drejtoheshin për në furrat e bukës që mbështeten nga PAM”.
Ushtria, dëshpërimi dhe ankthi nëse do të arrijnë më shumë ndihma ushqimore po përforcojnë pasigurinë në rritje, tha shërbimi i OKB-së, duke i bërë thirrje autoriteteve izraelite të “lejojnë hyrjen e shumë më tepërt ngarkesash me ndihma humanitare dhe më shpejt”.
COGAT, organizatë e Ministrisë së Mbrojtjes izraelite që mbikëqyr çështjet civile në territoret palestineze të pushtuara, njoftoi se 107 kamionë me ndihma humanitare hynë në Gazë të enjten.
Megjithatë, Philippe Lazzarini, kreu i Agjencisë së Kombeve të Bashkuara për Refugjatët Palestinezë (UNRËA), kujtoi sot se gjatë armëpushimit gjashtë javor që u ndërpre në mars, 500 deri në 600 kamionë hynin çdo ditë.
“Nuk duhet të habitet apo tronditet kush kur sheh skena ku ndihma e çmuar plaçkitet, vidhet apo ‘humbet’,” shkroi ai në X, duke shtuar se “populli i Gazës është i uritur prej më shumë se njëmbëdhjetë javësh”.
