Festivali i famshëm i luleve të qershisë pranë malit Fuji në Japoni është anuluar për këtë vit, për shkak të shqetësimeve serioze lidhur me mbingarkesën nga turistët dhe sjelljen e papërshtatshme të disa prej tyre.
Eventi vjetor, që zhvillohej në Parkun Arakurayama Sengen, tërhiqte rreth 200 mijë vizitorë çdo vit falë pamjeve ikonike dhe aktiviteteve kulturore. Këtë vit pritej një rritje edhe më e madhe e fluksit, e nxitur nga rënia e jenit, që e ka bërë Japoninë më të përballueshme për turistët e huaj.
Autoritetet e qytetit Fujiyoshida njoftuan më 3 shkurt anulimin e festivalit, duke përmendur probleme të rënda me trafikun, mbeturinat dhe shqetësimin e banorëve vendas.
Sipas tyre, janë regjistruar raste të shkeljeve serioze, përfshirë hyrjen e turistëve në banesa private për të përdorur tualetet dhe madje edhe defekim në kopshte private. Prindërit kanë shprehur shqetësim për sigurinë e fëmijëve, pasi vizitorët kanë shtyrë të miturit nga trotuaret e ngushta.
Megjithëse festivali është anuluar, autoritetet presin një fluks të lartë vizitorësh gjatë sezonit të lulëzimit të qershisë. Për këtë arsye, janë ndërmarrë masa shtesë sigurie dhe higjiene, përfshirë roje sigurie dhe vendosjen e tualeteve portative.
Turistët do të inkurajohen të përdorin transportin publik dhe të respektojnë pronën private, ndërsa shkeljet do të monitorohen më nga afër.
Edhe mali Fuji, një nga simbolet më të njohura të Japonisë, po përballet me pasojat e turizmit masiv. Rritja e ndjeshme e vizitorëve ka shkaktuar probleme me ndotjen dhe sigurinë.
Si masë kontrolli, vitin e kaluar u vendos një tarifë për ngjitjen në mal, me synimin për të kufizuar fluksin dhe për të mbrojtur mjedisin natyror.
Ndërkohë, qyteti Fujikawaguchiko ndërmori një hap drastik duke ndërtuar një gardh të lartë që bllokonte pamjen e malit Fuji, pas incidenteve të përsëritura me turistë.
Edhe pse gardhi u hoq më vonë për arsye sigurie, autoritetet deklaruan se ai nuk do të rikthehet, pasi kishte ndikuar në uljen e numrit të vizitorëve.
Megjithatë, autoritetet paralajmërojnë se masa të ngjashme mund të rikthehen nëse fluksi i turistëve vazhdon të rritet.
