Java që po vjen pritet të jetë me temperatura tipike dimri, me reshje shiu dhe dëbore, por do të ketë edhe ditë me diell, megjithatë, temperaturat do të mbeten të ulëta.
Për ditën e nesërme (e Hënë), moti do të karakterizohet nga vranësira mesatare deri të dendura dhe reshje shiu të herëpashershme me intensitet të ulët në shumicën e territorit, ndërsa në zonën e qendrës dhe jugut reshjet do të kenë intensitet deri mesatar në disa raste. Në relievet malore të verilindjes, mbi 300-400 metra, dhe në juglindje mbi 600-700 metra, do të ketë reshje dëbore, me intensitet të ulët dhe lokale deri mesatar.
Nga dita e Martë, pritet një përmirësim gradual i kushteve atmosferike, me vranësira mesatare deri të dendura dhe intervale të shkurtër kthjellimi, kryesisht në ultësirën perëndimore. Në relievet malore të verilindjes dhe juglindjes, vranësirat do të shoqërohen me reshje të dobëta dhe herëpashershme dëbore.
Për ditën e Mërkurë, moti përgjatë ultësirës perëndimore do të jetë me kthjellime dhe vranësira kalimtare, ndërsa në relievet malore të lindjes, moti do të jetë kryesisht i vranët, me intervale të shkurtra dielli.
Për ditën e Enjte dhe të Premte, moti do të jetë i kthjellët në të gjithë territorin, përveç vranësirave të pakta kalimtare, kryesisht në relievet malore të lindjes.
