Ekspertët e sigurisë kibernetike kanë ngritur alarmin për një skemë mashtruese që po përhapet me shpejtësi në WhatsApp, e njohur si mashtrimi “Hi Mum”. Sipas raportimeve ndërkombëtare, vetëm gjatë vitit 2025, kjo skemë ka arritur të mashtrojë përdoruesit duke u marrë mbi 490 mijë paund, duke përdorur madje edhe teknologjinë e inteligjencës artificiale për të imituar zëra.
Mashtrimi nis me një mesazh të thjeshtë si “Hi Mum” ose “Hi Dad”, ku personi paraqitet si një i afërm që ka humbur telefonin dhe nuk ka akses në llogaritë bankare. Pasi krijon një ndjenjë urgjence dhe fiton besimin e viktimës, mashtruesi kërkon ndihmë financiare për të paguar qiranë ose për të blerë një telefon të ri. Risia shqetësuese është përdorimi i AI-së për të gjeneruar mesazhe zanore që ngjajnë me zërin e fëmijës apo një të afërmi, duke e bërë mashtrimin shumë më të besueshëm.
Eksperti i sigurisë Jake Moore thekson se mashtruesit marrin mostra zanore nga rrjetet sociale për të krijuar imitime të sakta të zërave. “As nëna ime nuk e dalloi që ishte një zë i gjeneruar me inteligjencë artificiale,” thotë ai.
Sipas mediave të huaja, kjo skemë nuk kufizohet vetëm me mesazhe që nisin me “Hi Mum”, por mashtruesit mund të paraqiten si fëmijë, të afërm apo edhe miq të ngushtë, duke përdorur të dhëna të marra nga rrjetet sociale për të ndërtuar histori sa më të besueshme.
