Një 31-vjeçar shqiptar, i dyshuar si pjesë e një grupi të strukturuar kriminal të specializuar në vjedhje banesash, është arrestuar nga autoritetet franceze pas një urdhër-arresti evropian të lëshuar nga gjyqtari hetues i Trentos.
Arrestimi shënon një pikë kthese në një hetim të gjerë ndërkombëtar që përfshinte karabinierët italianë, autoritetet shqiptare dhe Interpolin.
Hetimet nisën në maj, pas arrestimit të dy personave të dyshuar për të paktën 23 vjedhje të kryera në zonën Val di Non, në rajonin Trentino.
Autoritetet italiane zbuluan se banda vepronte nga një vend i izoluar në malet e Valsuganës, ku u gjetën veshje të përdorura për grabitje, mjete vjedhjeje, radio komunikimi dhe balaklava.
Gjatë kontrollit, karabinierët zbuluan një automjet elektrik të fshehur nën një mushama, i cili ishte raportuar si i përfshirë në disa vjedhje në zonën Paganella.
Mjeti rezultoi të ishte vjedhur në provincën e Milanos në mars dhe ishte pajisur me targa të klonuara, të regjistruara në emër të një gruaje nga Bolzano, e cila nuk kishte asnjë lidhje me ngjarjen.
Pas arrestimit të të dyshuarit kryesor në Francë, Prokuroria e Trentos dhe karabinierët e Cles po intensifikojnë hetimet për të identifikuar dhe lokalizuar bashkëpunëtorët e tjerë të bandës, të cilët dyshohet se janë ende në liri.
